Francesco Capello


Francesco Capello Mestri elementâr a Caprive par cuarante agns, al è stât ancje Francesco Capello conseîr comunâl (sô e je la propueste di cambiament dal non di Capriva di Cormons in Capriva dal Friûl) ma al ven ricuardât, a Capriva e fûr di Capriva, soredut pe sô ativitât di cjantânt e di mestri di côr.

Tal 1924 al fondà il "Quartetto friulano" adun cun Renato Portelli e Gigi e Berto Sartori di Marian. Il "Quartetto" al ve grant sucès e al rivà a cjantâ ancje al Vitoriâl, devant di Gabriele D'Annunzio. In chê ocasion il stes D'Annunzio al de a Capello il sorenon di "Usignolo del Friuli".

Tal Avrîl dal 1929 al fo a Rome come corist te Corâl Gurizane (cun Gigi e Berto Sartori) par partecipâ cul cjant "Rapsodia friulana" di Seghizzi al secont "Concors Corâl" organizât dal O.N.D. Plui di cinc mîl cjantôrs a parteciparin a chel concors e la zurie dal mestri Francesco Mulè al de a la Corâl Gurizane il tierç premi assolût.

L'otêt
L'otêt

Plui tart, a Capriva, al impastanà ancje un "Otet" che al cjantà adun fintremai tai agns dal '60. Tal otet a jerin 2 tenôrs (in plui dal mestri Capello ancje Gusto Tirel), 2 tenôrs seconts (Lino Tonut e Nino Cuzzit), 2 baritons (Gino e Tilio Grion) e 2 bas (Pepi da Rosa e Gusto Grion).

Cu la corâl parochiâl di Capriva al partecipà tal 1926 al "Concors Regjonâl di Cjant Furlan" cjapant il prin premi e tal 1930 al "Concors di Côrs Furlans" a Gurize presentant il "5° Gotis di rosade" che l'autôr, Augusto Seghizzi, al veve dedicât propite a Capello.

Tal 1966 Capello al ricevè il "Premi Epifanie", premi impuartant a nivel regjonâl, che al ven dât a personis meritoris di vêsi segnalât par ativitâts impuartantis in favôr dal Friûl, cu la motivazion:

"Educadôr, animadôr e mestri di côrs, che par cuarante agns a àn fat ferade, in Friûl e fûr dal Friûl, simpri a part cun entusiasim di dutis lis manifestazions che a sostegnin la furlanetât e la sô culture."

Ma Capello al è stât ancje poete, componint i tescj di cetantis vilotis. Tra chestis e si ricuarde "Profugos" cu la musiche di G. Pian:

"E vegnin e van,
sbatudis dal vint:
sisilis in pene
si sbandin vaint.
E lassin al nit
cialànsi daùr
la ciase bessole,
la glesie ta'l scur.
No san ce c'a pènsin
ta'l frêt e ta nèf:
'ne lagrime cole
la bocie la bêf.

E 'l lavri 'l tremole
te grande passion:
- O fradi, mi dastu
'ne sinte, un bocon? -
- Oh lasse ch'o speri
che dût no mi mûr,
se 'l vif e mi clame
l'afièt dal to cûr! -
Sisilis snidàdis,
butàdis lontan.
Dolôr lis compàgne:
e vegnin e van.