«Zuiavin...»


Fevelade cun Nino Cuzzit, testemoni di chê maraveose stagjon dal cjant caprivês inmaneade di Capello e ultin restât dai cjantôrs dal innomenât "Otet". O sin lâts a cjatâlu a cjase sô, inte matine dal 13 di Fevrâr dal 2010. Cheste e je in struc la risulte di chê lungje cjacarade.

Nino Cuzzit Di ce an isal Nino?

O soi dal '22: i prins di Jugn o fâs 88 agns; o ai fat 36 agns di ferovie e 6 li di Maroni, tal ciment; prin dai 13 agns o jeri za a lavorâ, che ca di me e jere fan. O ai fat ancje doi agns di militâr, tal Gjeni dai Pompîrs, e un mês cui partigjans, a Caporêt, cun Gusto Badin che, o scugne dîlu, al coreve plui di me ma lui al vignive de Russie, rivât a scjampâ fûr de "Sache" cun Tunin Romeo; il Biont e Grion, invezit, a son restâts la sù.

Cuant aie començât a cjantâ?

O ai començât vonde prest: cuant che o vevi 17 agns o cjantavi za tal côr. Une volte la mestre Perco e disè: «Ma chel mûl là al cjante ben. Si podarès fâi fâ i studis e mandâlu indenant» ma ca di me ... imagjinâsi, e cussì o soi restât "incolto".

Fevelin dal otet...

Tal otet Gusto Tirel e Capello a fasevin i tenôrs, jo e Lino Tonut o jerin i seconts tenôrs, che a dovevin leâ i tenôrs cui bas; Gino Griunît e Tilio a fasevin i baritons, e a jerin doi baritons brâfs. Tai bas al jere Pepi da Rosa, che al faseve un mi cun vôs che al jere un spetacul, e Gusto Grion, il sartôr. Par me Pepi al jere salacor il miôr di ducj: jo no ai mai sintût un bas compagn. Lis sieltis lis veve fatis Capello e, se al mancjave cualchidun, al clamave ancje Mino Badin, che al veve però une vôs un pôc grocje, e a Capello no i leve tant.

Cuant che al mancjave Gusto, Capello mi diseve: «Passe di ca Nino»; cussì o cjantavi di secont e di prin tenôr, e o imparavi simpri dutis e dôs lis parts. Come seconts tenôrs jo e Lino o cjantavin come zuiâ.

Indulà vêso cjantât cul Otet?

O sin lâts a Udin, tal Palaç Di Toppo - Wasserman, a Tresesin; par scuasit vincj agns di file o sin lâts li da la Rocca Bernarda. O sin lâts a cjantâ une volte a Feagne, pe fieste dai mus, e dôs voltis a Tarcint, par Chino Ermacora, che al jere president de Filologjiche.

Chê volte tal "Dopolavoro"
Une volte o vevin di cjantâ tal "Dopolavoro", cuant che a jerin ancjemò i zucs de balis. A saran stadis a sintinus 500 personis, di dut il circondari. Al mancjave Gusto Tirel e Capello alore mi disè: «Passe di ca Nino». O dovevi cjantâ di prin cun lui. Prin di començâ Lino mi visà: «Viôt, Nino, che Capello ti lasse bessôl» parcè che lui al veve di direzi. Alore si vin metûts dacuardi che lui mi faseve segnâl cul dêt se lis notis a jerin justis, o ben se al vevi di tignî plui sù o plui jù, parcè che a cjantâ par plui di dôs oris di file ... o jeri dut intune aghe. E cussì o ai puartât fûr chê "Otobrade" ma o ai dovût cambiâ la canotiere! A la fin Lino però mi disè: «Nino, tu sês tu vuê l'autôr!»

La zelosie
Nino Cuzzit O sin lâts ancje intun paîs dongje Pordenon, invidâts da la mestre Aurora Cerruti che e faseve fieste par no sai ce tancj agns di scuele. Cuant che o sin jentrâts in glesie a son lâts fûr scuasit ducj: a jerin zelôs parcè che nô o cjantavin ben. Po ben, o vin fat un cuatri o cinc tocs di glesie - Capello al fasè l'Ave Maria - e rivâts insom planchin a son tornâts dentri ducj e a àn tacât a batinus lis mans. A la fin la mestre à braçât Capello vaint.

Il tenôr svantôs
Une volte o sin lâts a cjantâ tal Parc di Buri, cun Bruno Orzan di San Lurinz come prin tenôr. Lui al cjantave come tenôr tal Seghizzi. Tal otet i prins tenôrs a jerin doi ma cuntune vôs sole. Sta di fat che a un ciert pont, chest Bruno al fâs une piroete, par fâsi sintî, e Capello i fasè osservazion. Dut risintût al si cjape e al va vie. Cussì o ai dovût fâ il prin tenôr ancje in chê volte.

Cjantaviso a vôs scuvierte o jeriso compagnâts de musiche?

Simpri cence musiche e o dovevin imparâ dut ad a ments.

Ce repertori vevial l'otet?

O vevin un cuindis cjançons: Stelutis Alpinis, Profugos, In chê sere i griis cjantavin...

Vignìn a le corâl parochiâl...

Cul côr parochiâl o fasevin la "Prima" e la "Seconda Pontificalis", l'"Eucharistica" e la "Cerviana" dal Perosi.

Un dì, intune messe, Capello al jere grocj. Mi tocje duncje di cjantâ di prin tenôr cun Gusto Tirel. Al vevi in chê volte simpri un pocje di pôre prime di cjantâ e mi vevi cussì impensât un truc par sclarî la vôs: mi puartavi simpri te sachete une butiliute di vin, e ancje se o jeri sot pulpit, int bevevi un got e mi netave ben. Fintremai al dì di vuê, cuant che o voi fûr, e o voi fûr di râr, se o bevi mieze taçute o sinti subit il sburt a cjantâ. Nino Cuzzit In chel dì, duncje, o passi cun Gusto e il gno mieç litri al le di bot. Però Gusto in ultin mi disè: «Nino, tu âs reson: al zove!»

Finide la messe, par primis a van jù lis frutis e daspò i oms; jo o jeri l'ultin. Cuant che o rivi jù dute la int a stan batint lis mans e a son su la puarte la mestre Perco e so marît, e la mestre mi imbrace. Jo no pensavi che a batessin lis mans ancje par me: ce biel moment che al è stât. (si comôf)

Nino Cuzzit Si ricuardie di cualchidun de corâl?

Fra lis frutis a jerin lis fiis di Pepi da Rosa, la Ane e la Valeria, la femine di Lino, e une Brandulina, sûr di Sergio.

Cetantis provis faseviso?

Si cjantavin simpri dôs seris par setemane, li de scuele di chê volte, devant dal tor. La mestre Perco ur insegnave a lis frutis e daspò o provavin adun.

Cui sunavie te messis?

Mi pâr che a sunâ l'orghin al vignive un di Lucinîs, di non Vidoz. Daspò al à sunât a lunc Mario Capello e po dopo ancje la Gianna Marcossi. Il pari Ferucio al sunave cuachi volte il viulin. Di altris struments no mi impensi.

Vêso fat ancje dai concors?

O jerin une volte, subit dopo da vuere, a Gurize, tal Teatri "Verdi", cui côrs di Cormons (cun Spessot), Marian, Roncjis, e mi pâr ancje Lucinîs. In chel dì li o vin patît une grande injustizie. Al jere chel moment storic cuant che tai comuns si frontavin blancs e ros. Po ben, al tache par prin il côr di Roncjis (che al jere un comun ros) ma daspò dîs o dodis batudis il mestri al ferme dut: no jerin intonâts. A tornin a tacâ e vie fin insom a fuarce di schincadis. Nancje di dî: a àn vût il prin premi istès, ancje se no meretavin, parcè che a vevin decidût che al veve di vinci un comun ros. E je stade une injustizie.

Cjantavie ancje fûr dal côr e da l'otet?

O fasevi dispès un duet cun Delmo Grion, cussì par zuiâ. Une volte o sin in sagre a Morâr e o tachin a fâ un toc dai nestris. In curt o vin intor almancul 50 personis a bati lis mans e chê da orchestre, clamade a pueste, e jere restade bessole.

O levi ancje a cjantâ cun Gusto Tirel indulà che nus clamavin. Mi ricuardi che cuant che o provavin ca di Gusto o dovevin lâ inte stale, parcè che a sô mari no i plaseve sintî cjantâ. Ma te stale al è un altri odôr, al vûl arie nete par cjantâ.

O levin ogni tant a San Lurinz, clamâts di Ciluti dal Gobo, che al direzeve il côr locâl, sîs o siet di lôr. O cjantavin par solit il Requiem o Stelutis Alpinis e daspò de funzion o levin a finî simpri te sô cantine.

Une volte un ciert Spessot mi invide a cjantâ a Cormons parcè che a fasevin la Seconda Pontificalis, e jo e Gusto Tirel o sin lâts, che par nô la Seconda Pontificalis e jere come zuiâ. Al direzeve il mestri Caramel, che al jere ancje chel che nus puartave a Tarcint o a Rocca Bernarda cu la machine: jo no savevi che al jere mestri di côr - al direzeve ancje la bande militâr di Cormons - e o soi restât mâl. A jerin ancje altris cinc tenôrs che a cjantavin oltri che nô: di no sintîju, jo e Gusto si sintivin ma chei altris no rivavin a sintîju. A la fin il mestri Caramel al à saludât i siei ma al è vignût a bevi cun nô.

Ce si impensie dal mestri Capello?

Nino Cuzzit Cuant che si leve a scuele cun Capello si imparavin dutis lis parts, ancje chê dal bas, parcè che lui ... come dî, scuasit al imponeve la vôs juste; al jere dabon brâf.

Une volte, però, o ai vût di lui ancje une ofese. O jerin a cjantâ a Tresesin, al Boschetti, e Michelin (Michele Grion) mi disè: «Nino, sta atent di Capello» e cussì cuant che Capello al ordenà une altre tace, i disè: «Mestri, o vin di cjantâ» e lui di rispueste mi disè in public une brute peraule. Jo no jeri usât a jessi scoreât, tant mancul in public, e o soi restât une vore mâl. Ma Michelin mi clamà in bande, mi paià mieze tace di vin e mi de une pache su la spale: al jere un grant om.

Sierant...

No mi plaseve nuie altri che cjantâ. E o soi convint che li devant dal tor, in te scuele, o vin fat ancje culture. Par dut indulà che a cjantavin nus batevin lis mans e nus fasevin i compliments ma i amîs nus vignivin dongje e nus metevin la man su la spale: a savevin che nô o zuiavin...