Il cjant corâl a Capriva


Giovanni TorreGiovanni Torre

La prime corâl che e ven ricuardade e je chê metude sù e direzude di Giovanni Torre (1864 - 1933), prin mestri laic de scuele elementâr di Capriva (scuele a lui dedicade par chest motîf). Cheste corâl e ven nomenade tai anâi pe prime volte ai 10 di Dicembar dal 1922, cuant che e partecipe al "Prin Concors di Côrs Furlans" a Gurize, li dal cine Vitorie, imbastît da sezion C.A.I. locâl pe Fiere di Sant Andree.

Par ducj i partecipants al è obligatori eseguî "Al ciànt dal Friùl" di Augusto Seghizzi. A chest concors a parteciparin ancje i côrs di Vilès (direzût dal mestri Francesco Capello), di Monfalcon (Kubick), di Tarcint (Job), di Corona (Tonet), di Tresesin (Bertoli), di Parteulis (Tomasin) e di Gardiscje (Cusma).

Tal 1925 la corâl e partecipe al "Concors Regjonâl di Cjant Furlan" a Udin cjapant il secont premi. A la fin di chel an la direzion e passe a Francesco Capello (1894-1973), deventât intant zinar di Torre.

Gemma Perco Altieri

A començâ dai prins agns dal Cincuante la mestre Perco e direzeve il côr da lis frutis che al compagnave lis celebrazions tes seris dal mês di mai. In chê volte si usave a dî, dilunc chel mês, ogni sere il Rosari e a la fin si leievin lis storiis des aparizions de Madone a Fatima e Lourdes.

Mons. Giuseppe Trevisan

Passionât di musiche, cuant che al jere capelan a Capriva al judave a preparâ la corâl parochiâl insegnant ai bas fin a lis provis finâi cun dutis lis vôs. Don Pino Trevisan al sunave dispès ancje l'orghin e al è l'autôr di putrops tescj furlans. I Cjantôrs a proponin par Nadâl la sô traduzion par furlan di Stille Nacht.

La corâl tai agns dal '60
La corâl tai agns dal '60

Repertori

Il repertori de corâl parochiâl al comprendeve in particolâr lis messis di Lorenzo Perosi come la Prima e Secunda Pontificalis (a trê vôs) e la Messa a 3 voci maschili "Cerviana".

Tal 1946, pai cincuante agns di sacerdozi di mons. Giuseppe Viola, a fo imparade e cjantade la Benedicamus Domine e tal 1953, pai cincuante agns di Don Viola a Capriva, la Eucharistica (a cuatri vôs cun orghin).

Prin il mestri Mario Capello e daspò la mestre Gianna Marcossi a compagnavin il côr cul orghin. Il pari da Gianna, Ferruccio Marcossi, al sunave ogni tant il viulin.